Interesante idea de Colectiva mal desenvolvida

Pintores e mais escultores baixo o concepto-número de ‘vinte’ preséntanse na aula de cultura do Liceo durante o tempo de Nadal. Chegan da man de Mila Castro, coordinadora de arte, e da produtora Claqueta Coqueta do actor Rubén Rodríguez (‘Riós’). Dende eles nacen os ‘Vinte nas Burgas’, que no verán foron os ‘Vinte na Quintana’, en Santiago, a súa posta de largo. 

Cartel de M. Ebra

Pintores e mais escultores, principalmente, e gravadores, coñecidos e de longa traxectoria, comparten sala con outros de máis recente camiñar no mundo expositivo. E con eles os de traxectorias asimétricas, ou simplemente de voo máis curto.

Na mesa, o guerreiro de Francisco Pazos; na parede do fondo, Chema Dapena con dúas obras (a 2ª que é un tríptico do que só se amosa unha peza, sic !), e a obra de Carlos Costoya, quen ademáis puxo o viño...

Lamazares e Romero Masiá van na proa. Os dous repiten presenza expositiva, con Poldras, Costoya, Miguélez, de Sousas, Antonio Castro, Otero, Carlos Besada, M.A. Macia, Añón, Fraga ou Suso León, todos con dúas obras.

Do grande escultor Francisco Pazos, hai tan só un suxestivo guerreiro,obra menor.

Por contra, Manolo Ebra, do que vimos cinco obras, pequenos cadros a seguir dos artistas mais renomados. Está casado coa comisaria...

Con eles, desta volta, Alexandro, Galia Blanco, da Pena, Alicia Larssom e Astray. O diverso e irregular conxunto non ten máis argumento ou fío condutor que a varianza reunida.

Obra de Carlos Besada

 Denantes estiveron Vidal Souto, Santeiro, Leandro Sánchez e Moreiras, o que resulta paradóxico por tratarse de artistas que viven nesta terra..., como tamén algunha presencia / ausencia no elenco anunciado (como Moncho Conde, do que se anunciaba obra, estando sen embargo Suso León...).

En fin. Por todo, e polo recargado do conxunto, unido á deficiente información das obras, dificulta a correcta percepción do proxecto, que debe mellorar de ter continuidade noutras prazas...

                                                ***