Onte, no cemiterio de Cea

Onte, no cemiterio de Cea, un de novembro: primeira visita ante os restos da miña nai.

No entorno do centro (onde están o Evanxelistas esculpidos a mediados do século pasado por Antonio Faílde Gago), por trás de San Xoán barbilampiño co libro e a águia, repousa. A cruz -pedra na pedra-, e a inscripción do frontis, identifica á trébede de mulleres da familia materna: aboa, tía, nai. Chuvia maina, humidade e silencio no primeiro momento da tarde.

                     Dormir soñar morrer acaso agardar un encontro para se tornar caricia

                     e bañarse nas ondas
                     nas mesmas vivas aguas da existencia
                     sílabas delicadas ausencias repentinas
                     a se perder no reino do lamento:
                                             E ai Deus se virá cedo!

                             (Luz Pozo Garza -Ribadeo/1922-, Códice calixtino, 1986: 'Escolma. Cantiga para ler en tempo de penumbra')

Nesta tarde do día de Santos, con sol. Eran outros tempos...

                                                                             ...